MALAY, Aklan — Kapin sa 95% eon nga preparado ro Commission on Elections (COMELEC)-Malay para sa nagahilapit nga national and local elections sa Mayo 12, 2025.
Suno kay Atty. Jose Rowell Imperial, acting election officer it Comelec-Malay nga natigayon nanda nga masunod ro schedule it komisyon ag nakipag-angot eon sa mga natungdan nga ahensiya it gobyerno para sa maayos nga pagpatigayon it eleksyon sa Lunes.
Naging madinaeag-on sigon ro ginpatigayon nanda ko Miyerkules nga final testing and sealing it mga automated counting machines (ACMs) mag-eowas sa pilang minor concerns nga anda eon nga gin-report.
Owa man it naging problema sa ginpatigayon nga verification of official ballots kun sa siin nakumpirma nga ro mga ginpadaea nga balota hay para gid man sa banwa it Malay.
Samtang sa bilog nga probinsiya it Aklan, ro banwa it Malay suno kana ro nakalista it mabahoe nga numero it voter registration nga masobra sa 40,500 nga ginaeakipan it mga residente ag indibidwal nga nagatrabaho sa Isla it Boracay.
Sa 17 nga barangay, ro Manocmanoc sa Boracay ro nagapabilin nga may pinakamataas nga registered voters nga naga-abot sa 12,101, ginsundan it Balabag nga may 8,630, Caticlan nga may 5,153 ag Yapak nga may masobra sa 4,000.
Ro banwa hay may 17 nga voting center, 52 nga clustered precincts ag 156 nga board of election inspectors.
Kadungan kara, gin engganyo nana ro mga botante nga i-exercise ro andang kinamatarung nga magboto ag pag-isipan ro mga politiko nga igabutang sa pwesto nga magadumaea sa masunod nga tatlong dag-on.
