KALIBO, Aklan — Gin-welcome it St. John The Baptist Cathedral ag iba pang simbahan sa banwa it Kalibo ro pagtaeana sa bag-ong santo papa nga si Pope Leo XIV pinaagi sa dere-deretso nga pagpatunog it mga alingganay.
Suno kay Fr. Justy More, Chancellor it Diocese of Kalibo nga matapos nga makita ro puti nga asu halin sa chimney it Sistine Chapel ag pag-anunsyo sa publiko it Vatican hay ginpatunog nanda ro alingganay agud nga i-anunsyo sa tanan nga nakaangkon eon it bag-ong santo papa.
Bandang ala-1:30 it aga-aga it Biyernes hay ginbagting ro alingganay it Kalibo Cathedral ag bandang alas-6 ag alas-9 it agahon hay ginmandu man ni Bishop Jose Corazon Talaoc nga ipatunog ro alingganay it mga simbahan it Diocese of Kalibo bilang pagpakita it kasadya ag paghili-usa sa Roma ag bilog nga kalibutan bangud sa mabahoe nga regalo sa pag-angkon it bag-ong santo papa.
Dugang pa nana nga pwede man nga gamiton ro Hiligaynon sa pagtawag sa pangaean it santo papa bilang si Leon.
