KALIBO, Aklan — Ginbasura it Aklan Provincial Prosecutor’s Office ro kasong vote-buying kontra sa sangka 56 anyos nga eaeaki bangud sa kakueangan it ebidensya.
Raya ro ginkumpirma ni Police Captain Jayson Mausig, hepe it Madalag Municipal Police Station.
Sa makaron hay temporaryong nakahilway ro eaeaki base sa mandu it piskalya.
Dugang pa ni Capt. Mausig nga ginataw-an sanda it piskal it kahigayunan nga makatipon it dugang nga ebidensya para sa uman nga pagpasaka it kaso pinaagi sa regular filing.
Nasayuran nga ko Mayo 12, 2025 hay ginpasakaan it kasong pageabag sa Section 26 it Comelec Resolution No. 11104 si alyas “Romeo”, residente it Barangay Logohon, Madalag, Aklan matapos nga mabaeabagan sa sangka checkpoint bandang alas 9:15 it gabi-i ko bisperas it eleksyon samtang sakay it anang motorsiklo.
Raya hay matapos nga nabo-oe sa anang posisyon ro sangka stripe nga plastic sando bag nga may sueod nga mga sobre nga may kwarta nga naga-abot tanan sa P21,900 sa nagkaeain-eain nga denominations, sample ballots, campaign materials, ag listahan it coordinators ag leaders.
Sa pihak it nasambit nga gina alegar nga kaso it vote buying ag sangka pag-eabag sa gun ban, ginpahayag ni Capt Mausig nga pangkabilugan nga naging maayos ag matawhay ro pagpatigayon it bag-o eamang natapos nga eleksyon sa banwa it Madalag.
