Ginkumpirma it mga otoridad nga nakadihon it piyansa para sa anang temporaryong kahilwayan ro driver it SUV nga responsable sa pagkamatay it daywang pasahero sa makasueubo nga Car Crash sa Ninoy Aquino International Airport ku kan-o eamang.
Maabot sa P100,000 nga piyansa ro ginpataw it Pasay City Regional Trial Court sa 47 anyos nga eaeaking driver para sa kasong reckless imprudence resulting in double homicide, multiple serious physical injuries ag damage to property.
Suno kay Manila International Airport Authority General Manager Eric Ines, kinahangean nandang sumunod sa sugo it korte matapos nga mabaton ro Pasay court bail order.
Ginpahayg man it PNP Aviation Security Group nga nabation eon nanda ro kasuguan halin sa korte.
Sanda ro nagpanguna sa imbestigasyon it insidente nga nagresulta sa pagkamatay it ap-at nga dag-on nga ungang babaye ag 29 anyos nga eaeaki sa departure entrance area it NAIA Terminal 1.
Una eon nga nagpanindugan ro driver it SUV nga aksidente ro natabo aguwa nana ginatuyo ro nasambit nga hitabo. Nagnegatibo man ro nasambit nga driber sa paggamit it ilegal nga droga ag alcohol .
