Madinaeag-on nga nakuhit it sangka graduate it nursing ro handum nana nga lisensya.
Suno kay Angelo Oloroso, newly licensed nurse, bukon naging madali ro daean sa pag-angkon it handum nga lisensya apang pasaeamat imaw nga nakuhit nana raya. Second choice eon lang sigon nga makabig ro anang pag-eskwela it nursing bangud ro ana nga minatuod nga handom hay ro maging midwife kapareho sa anang ina.
Apang bangud sa nagtuhaw nga pandemya, napagdesisyunan eon lang nana nga mag nursing iya sa probinsya it Aklan.
Naging malisod suno kana ro anang pag-eskwela, mageuwas sa mga naeksperyensyang hangkat samatang naga online class sa unang dag-on it anang pagiging kolehiyo, bukon man naging madali ro pagsueod it face-to-face classes kana bangud eon man sa ginapangatubang nga hangkat sa pinansyal nga aspeto.
Suno pa kana, anang nanay eon lang ro nagabulig kana para makuhit ro anang handum nga maging registered nurse bangud isaea raya nga solo parent, dugang pa nga kilaea ro anang kurso nga magastos pag-abot sa mga kinahangeanon.
Bangud kara, gina tipid eon lang sigon nana ro anang sarili ag naga-iwas eon lang sa mga temtasyon nga mag gasto.
Pagkatapos sigon nga mag-graduate, nagdesisyon imaw nga mag pundo anay, apang ginsaeap eon lang sigon imaw it anang professor ag ginbuligan nga magbayad sa review center para maka review agud makabuoe imaw it board exam.
Dugang pa nana, mabahoe ro anang pagsalig nga mapasa nana ro nasambit nga examinasyon bangud mahambae nanang maeuomo para kana bangud eon man sa anang mga na-reviewhan. 2 days eang sigon ro andang naging pahuway antes mag buoe it exam ag makabig man nana nga advantage raya bangud fresh pa ro anang mga natun’an.
Nagapasaeamat imaw sa Ginuo sa pagpamati sa anang pangamuyo, ag pati eon man sa anang nanay nga uwa nag-sawa nga mag-suporta kana.
Mensahe eon lang nana sa mga nagahandum nga maging registered nurse nga maging consistent eon lang sa pagreview ag indi mag tinamad bangud kun gustohon, hay makaya gid tanan nga hangkat.
