KALIBO, Aklan — Kulong ro sangka miyembro it LGBTQIA+ matapos maaresto sa ginpatigayon nga drug buy-bust operation it Provincial Drug Enforcement Unit ag Kalibo Municipal Police Station sa Purok 2, C. Laserna St. Brgy. Poblacion, Kalibo, gabi-i it Huwebes, Mayo 22, 2025.
Ginkilaea ni PMAJ Frenzy Andrade, hepe it Kalibo MPS ro naaresto nga si Alden Duran, 48-anyos, may asawa, residente it Poblacion, Banga ag nagapanag-iya it sangka parlor sa banwa it Kalibo.
Suno kay PMAJ Andrade nga haeos tatlong domingo man nanda nga ginpaidaeum sa surveillance ro suspek antes nga ginkasa ro operasyon nga nagresulta sa pagka-aresto kana.
Ginasugid nga naga-agto eamang imaw sa lugar kon may iga-deliver nga droga.
Ginapatihan nga imaw ro nagbueos kay alyas Buaya sa pagdeliver it shabu sa lugar matapos nga raya hay madakpan ko nagtaliwan nga mga binuean.
Narekober kay Duran ro pito tanan nga plastic it suspected shabu nga may bug-at nga pitong gramo nga may estimated street value nga naga-abot sa P48,000.
Nagapangatubang ro suspek sa reklamong pageabag sa RA 9165 ukon Comprehensive Dangerous Drugs Act of 2002.
Samtang, padayun nga ginapabaskog it kapulisan ro andang kampanya kontra sa ilegal nga droga agud nga matapna raya sa banwa it kalibo ag madakpan ro mga personalidad nga eakot kara.
