Gintaw-an it kahigayunan nga makahilway ro tatlong binatilyo matapos nagpromisa nga pagabayran ro mga item nga andang gin-pang shoplift sa sangka establisyimento sa banwa it Kalibo nga natabo ko nagtaliwan nga adlaw it Miyerkules.
Suno kay P/Lt. Arnold Tejada, imbestigador it Kalibo Municipal Police Station, naaktuhan ro mga raya sa cctv footage nga may ginadikwat nga item rason nga gilayon nga ginmonitor ro mga raya.
Sa pag-usisa it staff it establisyimento narekober ro sangka charger ag bike tools nga gina boeobanta nga nagabalor it P300 rason nga ginbitbit ro mga raya sa taeatapan it pulisya.
Nasayuran nga mga residente it banwa it Numancia ro mga binatilyo ko ulihi hay nag-apela sa tag-iya it negosyo nga paguwaon ro mga raya ag nagpromisa nga pagabayaran ro andang mga nadikwat nga items.
Nasayuran nga haeos tanan nga mga establisyimento sa banwa it Kalibo hay may nakakabit nga cctv camera rason nga madali nga maidentify ro mga indibidwal nga nagapamentaha.
