Inde magnaba sa ap-at nga Pilipino ro naninahan ag gindaea sa ospital matapos ro ginpatigayon nga airstrike it Iran bilang baeos sa Israel suno sa Department of Foreign Affairs (DFA).
Ginpahayag ni DFA Undersecretary Eduardo De Vega, ro mga naninahan nga Pinoy hay halin sa Rehovot, sangka syudad nga una sa 20 kilometro sa nabagatnan it Tel-Aviv.
Mag-eowas sa ap-at, may 12 pang Pilipino ro una sa sangka parke kat tumama sa lugar ro missile it Iran.
Suno mat-a sa Philippine Embassy sa Israel, sangka pinay ro nawad-an it panimaeay ag presenteng nagadayon sa hotel matapos tamaan it mga missile ro Ramat Gan, nakatundan it Tel Aviv.
Gina-review eon man it Philippine Embassy sa Israel kon kinahang-ean eon nga ipatuman ro boluntaryo ukon sapilitang repatriation para sa mga Pilipino sa mga masunod nga inadlaw.
Suno kay De Vega, kapin sa 30,000 ro mga Pilipino nga idto makaron sa Israel.
