Gin-aresto it mga otoridad sa Chiba Prefecture, Japan ro sangka 51-anyos nga streamer nga kilaea bilang si “Zokkunzokkun” matapos maglibot sa sangka residential area nga may suksok nga panty sa anang itsura.
Tuyo kunta it eaeaki nga makaangkon it mas maabu nga viewers sa anang online livestream, apang nagresulta raya sa anang pagkapreso ag pagbatikos halin sa publiko.
Natabo ro insidente sa syudad it Ichikawa.
Nakasuksok si Zokkunzokkun it puti nga gym uniform, puea nga bloomers, ag pink nga underwear nga nakatabon sa anang ilong ag bibig.
Gin-livestream nana raya samtang nagalibot sa mga baeay.
Bangud kara, maabu nga residente ag online viewers ro nag-report sa pulis ag natigayon nga maaresto ro eaeaki .
Gin-ako nana nga gin-obra nana ro nasambit nga butang agud nga makadugang it viewers sa anang channel nga may kapin 5,000 followers.
May iba man nga mga pumueuyu ro nagkwestyon kun ham-an nga gindakop imaw.
Nagpanindugan man ro Chiba Prefecture nga ginapatuman eang nanda ro nuisance prevention ordinance agud mapabilin nga matawhay ro komunidad nga owa it aktibidad nga bastos ukon bukon it disente nga makit-an it publiko.
