KALIBO, Aklan — Puro masaligan ag may kredibilidad ro mga personalidad nga ginbo-oe ni Pangueong Ferdinand Marcos Jr., sa ginbilog nga Independent Commission for Infrastructure.
Suno kay Atty. Harry Sucgang, political analyst sa Aklan nga sanday Andres Reyes, dating supreme court justice , Rogelio singson, dating secretary it DPWH, Rosanna Fajardo, SGV country managing partner ag Baguio City Mayor Benjamin Magalong nga nagatindog bilang special adviser hay kilaea nga may mga ikasarang, integridad, katamparan ag pagiging hilway.
Nagaeaum imaw nga maeakip sa ginbilog nga independent commission si dating Senior Associate Justice Antonio Carpio nga ro anang ina hay tumandok it Aklan.
Daeayawon sigon ro pagbaton nanda sa nasambit nga trabaho maskin nga puro mga gamhanan ag kwartahan ro andang pagabanggaon nga mga tawo.
Sa pihak nga parte, nagapati si Atty. Sucgang nga pwede pa nga mabawi ro mga nakamkam nga kwarta it mga ginapatihan nga konektado sa maanomalyang flood control ag iba pang infrastructure projects pinaagi sa pag-freeze ag pagbo-oe sa andang mga assets, pondo, deposits ag property.
Nasayuran nga kaibahan sa trabaho it ICI hay ro pagtau it monthly report sa Office of the President pinaagi sa Office of the Executive Secretary.
