KALIBO, Aklan — Dapat nga ipatuman sa tanan nga oras ro laye angot sa ‘No Smoking Policy’ sa sueod it mga pampasaherong saeakyan.
Raya ro ginpahayag ni P/Lt. Sally Mar Bretania, tagapaghambae it Kalibo Municipal Police Station kasunod it reklamo nga gindangop kanda it sangka babaye nga dating media practitioner sa Aklan ko adlaw it Martes, Oktubre 28, 2025 nga gina-alegar nga naka-eksperyensiya it pagpangbastos halin sa anang kapareho nga pasahero sa sangka tricycle nga anang ginsita bangud sa pagpanigarilyo kara sa sueod it saeakyan.
Gindugang pa ni Bretania nga kinahangean nga makaangkon it respeto sa mga pasahero eabi eon ro mga owa nagasigarilyo ag may gina angkon nga sakit .
Kon ro driver sigon hay bawae nga magsigarilyo, mas hugut nga ginabawae ro mga pasahero.
Ro asu ag ro abu halin sa sigarilyo hay perwisyo sa tawong nagahanggop kara.
Base sa tagreklamo, naakig sigon ro anang kapareho nga pasahero kat anang sitahon bangud nga ro asu ag abu hay naga-apok paagto sa anang direksyon.
Agud nga malikawan ro mainitan nga komprontasyon ginpakamayad eon lang it complainant nga magpanaog ag magpa-blotter sa Kalibo MPS.
Sa makaron hay ginatinguhaan nanda nga mareview ro mga CCTV camera sa lugar sa pag-eaum nga ma-trace ro tricycle ag mabo-oe ro anang body number agud nga madali nga masayuran ro nagapanag-iya kara sa taeatapan it Taffic and Transport Management Division (TTMD) it LGU-Kalibo ag posibleng makilaea ro identity ukon pagkatawo it ginareklamo nga pasahero.
