Gin-usisa ni Senator Rodante Marcoleta ro pagtaas it confidential funds it Office of the Secretary it Department of Justice (DOJ).
Sa budget deliberation para sa DOJ sa masunod nga dag-on, gintumod ni Marcoleta ro ₱526 million confidential fund ko 2023, nagnaba ko 2024 sa ₱168 million, ag makaron nga 2025, nagsaka raya sa ₱1.5 billion, ukon 800% ro gintaas sa pondo.
Paathag ni Senator Sherwin Gatchalian, ro sponsor it DOJ 2026 budget, ro Kongreso ro nagpadugang it masobra sa ₱1-bilyon sa confidential funds it DOJ.
Naeakip sa rason sa pagsaka it pondo hay ro mainit nga imbestigasyon kato it mga naduea nga bulangero ag sa POGO.
Para sa masunod nga dag-on, ginapangayo it DOJ nga mataw-an sanda it dugang nga pondo sa confidential funds bangud maabu sanda nga gina-imbestigaran kapareho it mga anomalya sa flood control projects ag ro Witness Protection Program nga magakinahangean it ₱500 million.
Apang ginhinyo ni Marcoleta nga bawasan it tunga ro confidential funds it DOJ sa 2026 ag itau ro ginbawas kara sa Office of Alternative Dispute Resolution, kun sa siin ginasolbar ro mga kaso nga pwede pa nga maayos.
Sa masunod nga dag-on, ginapataw-an it Senate Committee on Finance ro DOJ it ₱729 million nga confidential fund.
