KALIBO, Aklan — Madinaeag-on nga napatigayon ro ASEAN Senior Economic Officials Meeting Retreat sa Boracay umpisa ko Disyembre 10 hasta 13 it makaron nga dag-on.
Raya ro ginpahayag ni P/MSgt. Jane Vega, tagapaghambae it Aklan Police Provincial Office (APPO).
Suno kana nga madinaeag-on nga nabuytan it mga awtoridad ro andang obligasyon sa pagpanguna ni Police Regional Office 6 director ag nagatindog nga 1st ASEAN Site Task Group Boracay chairperson P/BGen. Josefino Ligan, kun sa siin, nakalista it “zero incident.”
Ginpahayag ni Vega nga naging yabe sa madinaeag-on nga pagtutok sa ASEAN-related activities hay ro pagkaeasugot ag kooperasyon it local government unit it Malay, PNP ag iba pang natungdan nga ahensiya it gobyerno.
Sa ginpatigayon suno kana nga pag-libot it national, regional ag local inspecting team hay nagpatigayon eagi it spot correction sa nakita nga mga diperensiya.
Tanan sigon nga nakadeploy nga tawuhan hay hugut nga nagbantay para masiguro ro seguridad ag kaeowasan it mga delegado, turista ag publiko.
Ginpaathag ni Vega nga naging epektibo ro ginpatuman nga security plan kaibahan ro masobra sa 2,000 nga mga nakadeploy nga kapulisan ag augmentation force halin sa kaiping nga mga probinsiya ag nagkaeain-eain nga municipal police stations sa Aklan.
Ko Sabado nga adlaw pagkatapos it event, insigidang gin-pull out ro mga gin-augment nga kapulisan kaibahan ro andang mga patrol cars pabalik sa andang natungdan nga mga probinsiya bilang pag-umpisa it andang deployment sa pag-umpisa it Simbang Gabi.
Samtang, ginaeauman suno kana nga magabisita sa Isla it Boracay ro mga delegado it ASEAN summit 2026 sa buean it Marso.
