KALIBO, Aklan — Ginaeauman nga matapos ro nagapadayun nga construction it P2-milyon nga road project sa Sitio Libtong, Brgy. Estancia, Kalibo sa buean it Pebrero it makaron nga dag-on.
Suno kay Punong barangay Daisy Andrade it nasambit nga lugar nga sa oras nga matapos ro proyekto hay makatau raya it kasoehayan sa mga motorista ag residente eabi pa ag ginagamit ro nasambit nga karsada bilang alternatibong ruta.
Dugang pa nana nga nagtinguha imaw nga makapangayo it pondo sa provincial government agud nga maayos ro karsada nga lubak-lubak eon nga makabig nga takaw-aksidente.
Kadungan kara, nagpangayo imaw it pasaylo sa mga motorista sa temporaryo nga pagpasarado sa lugar agud nga mapadasig ro pagsemento it magtimbang nga karsada.
Ro proyekto hay gin-umpisahan pagkatapos it Ati-Atihan festival sa banwa it Kalibo ag ginaeauman nga matapos sa sueod it 15 diyas .
