NEW WASHINGTON, Aklan — Nagapadayun ro imbestigasyon it kapulisan sa pagkahueog it sangka pick-up truck nga kargado it daywang balde it mga sinsilyo sa seawall sa Brgy. Tambak, New Washington, bandang alas-7:50 it agahon it Biyernes, Pebrero 6, 2026.
Base sa imbestigasyon, naninahan ro daywang sakay it trak kaibahan ro driver.
Insigida man nga gindaea sa ospital ro driver nga residente it Brgy. Laguinbanua East, Numancia nga nag angkon it lastro sa anang ilong ag sueang (chin), apang maswerteng owa it anuman nga nina nga naagum ro anang 25 anyos nga kaibahan nga taga-Kamuning Quezon City.
Naghalin sa banwa it New Washington ro saeakyan nga paagto sa direksyon it Kalibo matapos nga mag-koleksyon sa piso-wifi-business it andang amo.
Suno sa kapulisan, samtang nagahana nga mag-overtake ro pick-up truck sa kasunod nga saeakyan, naduea-an it kontrol ro driver rason nga tumagilid ag eubusan nga nahueog sa seawall.
Naging madanlog ro karsada sa lugar bangud sa nagkalhit nga mga maintok nga bato nga gindaea it mabaskog nga humbak.
Sa pihak nga parte, naging mabudlay ro paghaw-as sa nahueog nga trak it mga katapo it Provincial Disaster Risk Reduction and Management Office ag MDRRMO-New Washington gamit ro boom truck ag rescue vehicle it PDRRMO-Aklan.
Nagbulig man sa pagbira it saeakyan ro mga residente sa nasambit nga lugar.
Ro saeakyan hay sa kustodiya eon it New Washington Municipal Police Station para sa nagakaigo nga disposisyon.
