Ginaeauman nga mas magiging maugan ag madasig eon ro biyahe it mga motorista matapos nga eubusan nga makompleto ro Road project sa Sitio Libtong Brgy. Estancia, Kalibo.
Raya ro ginpahayag ni Punong Barangay Daisy Andrade it nasambit nga lugar.
Apang suno kana nga base sa pahayag it contractor hay pagabuksan ro nasambit nga newly constructed nga karsada sa maabot nga Pebrero 18.
Mabahoe ro andang pagpasaeamat kay Aklan Governor Jose Enrique Miraflores sa pagtaeana it pondo nga kapin sa P2 milyon.
Ro nasambit nga proyekto hay makabulig sigon sa paghaeuga it trapiko sa national highway bangud nga nagaserbi raya nga alternatibong ruta eabi eon kon rush hour ag may mga mabahoe nga event.
Dugang pa nana nga nagtinguha imaw nga makapangayo it pondo sa provincial government agud nga maayos ro karsada nga lubak-lubak eon nga makabig nga takaw-aksidente.
Ro proyekto hay gin-umpisahan ko Enero pagkatapos it Ati-Atihan Festival 2026 sa banwa it Kalibo.
