Nilinaw ng Department of Foreign Affairs (DFA) na ang pag-aresto at pagpapabalik sa bansa kay dating mambabatas Zaldy Co ay nangangailangan ng koordinadong whole-of-government approach, at hindi lamang nakasalalay sa kanilang ahensiya.
Ayon sa DFA, kabilang sa proseso ang pakikipag-ugnayan sa mga law enforcement at hudisyal na institusyon, pati na ang koordinasyon sa Interpol. Binanggit din ng kagawaran na hindi sapat na ilarawan ang usapin bilang responsibilidad lamang ng DFA dahil nangangailangan ito ng sama-samang pagkilos ng iba’t ibang tanggapan ng pamahalaan.
Nauna nang kumilos ang mga awtoridad upang matunton si Co matapos ang ulat na siya ay umalis ng bansa. Nakipag-ugnayan ang mga ahensiya kabilang ang Department of Justice, Department of the Interior and Local Government (DILG), Philippine National Police, at DFA.
Iginiit ng DFA ang kanilang paninindigan sa pagsunod sa batas at due process, at hinikayat ang publiko na magbahagi ng impormasyon ukol sa kinaroroonan ni Co. Anila, nakahanda silang magbigay ng diplomatikong tulong alinsunod sa kanilang mandato at umiiral na mga patakaran.
