KALIBO, Aklan — Makabig nga distraction ro tempranong pag-anunsyo it political plan para sa 2028 ni Vice President Sara Duterte.
Raya ro pagpati it political analyst nga si Atty. Harry Sucgang.
Suno kana nga posibleng gina-tan-aw eamang it bise presidente kon maabu pa ro mga nagasimpatiya kana angot sa impeachment complaint nga anang ginapangatubang sa makaron.
Tuyo sigon it nasambit nga strategy nga guluhon ro mga gustong magpatalsik kana sa pwesto.
Dugang pa nga raya hay sangka desperado man nga tikang agud nga paeagiwan ro anang saeabton sa mga mabug-at nga pasibangud kontra kana partikular ro korapsyon, saea nga paggamit it confidential funds, ag pagsamad sa pagsalig it publiko.
Ro deklarasyon sigon ni Duterte hay bukon it angot sa pagserbisyo sa publiko kundi pagpataeang ukon pag-divert sa naratibo, nga ro impeachment kontra kana hay politikal nga pagpamigos imbes nga sangka konstitusyonal nga proseso para pasabton ro sangka opisyal nga nagkasaea.
Samtang, nagapati si Atty Sucgang nga sarang nga makatipon ro Kamara it kinahangeanon nga one-third vote para sa madasig nga impeachment process, apang indi pa masayuran ro madangatan kara Senado kun sa siin sa impeachment proceedings hay numbers game man sa gihapon ro nagapangibabaw.
