Duguan nga gindaea sa Aklan provincial hospital ro sangka eaeaki matapos nga gin-eabo it anang nakainuman sa andang pag-uli kara sa pabahay sa Brgy. Jugas, New Washington, bandang alas-7:30 dominggo it gabie.
Ginkilaea ni Kagawad Rommel Pronton ro biktima nga si Rene Rontale kon sa siin nakaangkon it lastro sa anang waea nga alima matapos nga gin-eabo it ginatumod nga suspek nga si Randy Gavino, parehong una sa legal nga edad ag nagaistar sa nasambit nga pabahay.
Sa inisyal nanda nga imbestigasyon, nag-inuman ro daywa sa Brgy. Mataphao kon sa siin sa pag-uli it mga raya hay uwa pa sanda nakuntento ag naghapit pa sangka ilimnan rason nga nadugangan pa gid ro andang ininom nga aeak.
May nagpatunga sigon nga diskusyon sa daywa bangud sa bitbit nga tubular ni Rene kon sa siin nakaabot sa punto nga ginbuoe ni Randy ro ana nga espading ag gin-eabo sa biktima.
Ro insidente hay nagtuga it disturbo sa andang mga kaeapit nga unit it pabahay rason nga gin-impormahan nanda si kagawad Pronton ag gin-awat ro daywa.
Si Rontale hay presenteng naka-confine sa nasambit ospital para sa anang nagakaigong pagbueong samtang si Gavino hay matapos nga gin-eapatan it paunang medikasyon gilayon man nga ginrefer sa outpatient department.
Ro insidente hay padayon pang ginaimbestigahan it New Washington Municipal Police Station para sa nagakaigong disposisyon.
