BANGA, Aklan — Kasunod it maka-alarma nga pagpanakit it grupo it mga pamatan-on sa sangka binatilyo, ginmandu ni Banga Mayor Noel Redison ro mas pa nga pagpabaskog it police visibility sa mga pampublikong lugar ag mas hugut nga implementasyon it curfew para sa mga minors sa nasambit nga banwa .
Suno kana nga mas mayad nga pabaskugon pa gid ro pagpatrolya sa mga matawong lugar kapareho it mga plaza, palibot it mga eskwelahan ag mga lugar nga kaeabanan nga ginatambayan it grupo it mga pamatan-on .
Ginpahayag dugang nga insigida man nana nga gin-aksyunan ro insidente nga natabu sa Teodosio’s Park kaibahan ro kapulisan ag si Punong Barangay Oying Rago it Brgy. Poblacion, kun sa siin, natigayon nga ma-imbitahan ro tatlo sa mga menor de edad nga ginaturo nga eakot sa kinagamo.
Ro insidente suno kana hay nakapukaw sa atensyon it publiko ag netizens angot sa nagakatabu nga juvenile violence nga nagtuga it bukon it manami nga impresyon sa andang banwa nga ginbansagan pa sigon nga ‘Banga the Beautiful”.
Pinaagi sa presensiya it mga awtoridad hay malikawan suno kana ro mga makarondaya nga insidente ag maduso ro kaeowasan it lugar .
Samtang, nagpromisa suno kana ro mga naimbitahan nga mga pamatan-on nga indi eon mauman ro insidente.
Gin-insister pa ni Mayor Redison nga ro instriktong pagpatuman it ordinansa angot sa curfew sa mga minors hay importante agud nga madisiplina ro mga raya ag matapna ro kinagamo.
Nasayuran nga ro curfew for minors ordinance it banwa hay nagabawae sa mga pamatan-on ukon 18 anyos panaba nga magwinarang sa katung-anan it alas-10 it gabi-i hasta alas- 4 it aga-aga nga owa it kaibahan nga ginikanan ukon guardian.
Kadungan kara, nag apela ro alkalde it kooperasyon halin sa tanan nga sektor eabi eon sa mga ginikanan sa pagsabat sa nasambit nga isyu .
Dapat sigon nga giyahan it mga ginikanan ro andang mga inunga sa tama nga daean ag tur-an nga maging responsabli nga mga indibidwal.
