Naka-deploy eon ro masobra sa 1,900 nga security personnel para magdumaea sa nakataeanang mga ministerial meetings makaron nga buean it Marso it Association of Southeast Asian Nations (ASEAN) sa Isla it Boracay nga pagahiwaton umpisa Marso 5 hasta 6 ag Marso 26 it makaron nga dag-on.
Suno kay P/Capt. Aubrey Ayon, tagapaghambae it Aklan Police Provincial Office (APPO) nga sa nasambit nga numero, kapin sa 1,000 ro mga pulis nga kaabuan hay augmentation force halin sa nagkaeain-eain nga municipal police stations sa Aklan ag police provincial offices sa Western Visayas.
Ro nabilin nga iba pa hay contingent it Armed Forces of the Philippines (AFP), Philippine Coast Guard (PCG) ag Bureau of Fire Protection (BFP).
Ginpasiguro man it opisyal nga haum ro andang linya agud nga masiguro nga ro ASEAN ag mga aktibidad kara hay magiging maayos, malinong ag madumaeahan it mayad.
Samtang, ginpahayag pa kara nga hugut nanda nga pagabantayan ro venue it event, mga VIPs ag delegado.
Ro mga nagapatrolyang pulis sigon hay magagamit it drones, body worn cameras samtang ro mga patrol cars hay pagakabitan it mobile digital recording para sa real-time monitoring it PNP Command Center (PCC) sa national headquarters.
Nasayuran nga ro ASEAN Senior-Level Committee on Financial Integration nga pagapangunahan it Bangko Sentral ng Pilipinas hay pagahiwaton sa Marso 5 hasta 6 samtang sa Marso 26 ro 44th ASEAN Capital Markets Forum Chairs’ Meeting nga pagapangunahan man it Securities and Exchange Commission.
