NATIONAL News — Nagdasig ro inflation ko Pebrero ag nag-abot sa pinakamataas nga lebel sa sueod it 13 buean, nga nagapangunang rason it mas mataas nga presyo it pagkaon ag non-alcoholic beverages, pati eon it housing ag utilities, suno sa datos nga ginpaguwa it Philippine Statistics Authority (PSA) adlaw it Huwebes.
Nagtaas sa 2.4% ro inflation ko Pebrero, mas madasig kaysa 2.0% ko Enero ag 2.1% ko Pebrero 2025. Raya ro pinakamadasig nga lebel umpisa nga mag-abot sa 2.9% ro inflation ko Enero 2025.
Ro core inflation, nga bukon it kaibahan ro piling food ag energy items, hay una sa 2.9% ko Pebrero, mas mataas sa 2.8% ko Enero ag 2.4% ko Pebrero 2025.
Suno sa PSA, nagtueod man sa pagtaas sa presyo ro housing ag utilities, nga may inflation nga 3.5% ko Pebrero halin sa 3.3% ko kaparehong buean ko nagtaliwan nga dag-on. Mas madasig man nga nagtaas ro inflation sa restaurants and accommodation services (4.4%), recreation, sport, and culture (4.3%), health (3.2%), furnishings and household equipment (2.9%), personal care and miscellaneous goods and services (2.8%), ag clothing and footwear (2.4%). Ginaboeobanta nga 29.9% ro ambag it housing ag utilities sa overall inflation, samtang 17.8% man ro restaurants and accommodation services.
Nagsaka ro food inflation sa 1.6% halin sa 0.7% ko Enero apang mas manaba sa 2.6% ko Pebrero 2025, ag may 24.2% kontribusyon sa overall inflation. Tumaas it 3.4% ro presyo it bugas, samtang mas madasig man ro year-on-year increases sa corn, flour, fish and other seafood, milk and other dairy products, fruits and nuts, ag vegetables.
Mas manaba naman ro annual increases sa oils and fat, ag ready-made food and other food products not elsewhere classified.
Samtang, mas nagdaeum ro pagnaba it transport index nga may annual decline nga 0.3% ko Pebrero halin sa 0.2% ko Enero, apang ginpahayag ni National Statistician Claire Dennis Mapa nga posibleng maging positibo ro transport inflation sa Marso bangud sa mga nagakatabu sa Middle East.
Ginpahayag it Department of Energy (DOE) nga posibleng magtaas pa ro presyo it petrolyo bangud sa mga global developments kapareho it pagsarado it Strait of Hormuz. Nauna eon nga ginpataas ro pump prices it P1.90 kada litro sa gasolina, P1.20 kada litro sa diesel, ag P1.50 kada litro sa kerosene ko Martes, Marso 3, 2026.
Base pa sa report, napatay sa US-Israeli airstrikes ko weekend ro Iranian Supreme Leader Ayatollah Ali Khamenei, nga ginkumpirma man ko ulihi it Iranian state media.
Dugang pa kara nga ginpahayag ni US President Donald Trump nga magapadayun ro combat operations sa Iran hasta nga maangkon ro mga katuyuan ag ginkumpirma nana nga tatlong US service members ro namatay ag posibleng madugangan pa ro casualties.
