Magapatigayon man it hubeag protesta kaibahan ro noise barrage ag panawagan para sa pagbasura sa Oil Deregulation Law ro Bagong Alyansang Makabayan ukon BAYAN Aklan bilang sabat sa serye it “big-time” oil price hikes tuga it krisis sa Middle East nga nakaka-apekto sa suplay.
Suno kay Kim Sin Tugna, provincial coordinator it Bayan–Aklan nga raya hay bilang pag-ugyon sa progresibong grupong PISTON, alyansa it mga transport sector sa bilog nga Pilipinas sa ginakasa nga transport strike ag welgang bayan, adlaw it Huwebes ag Biyernes, Marso 19 ag 20.
Mag-eowas sa pagbasura sa Oil Deregulation Law, ginaduso man nanda ro pagsuspinde ukon eubusan nga pagduea sa Excise Tax sa mga produktong petrolyo ag ro pagbo-oe sa 12% nga Value-Added Tax agud nga makatau it insigidang kasoehayan sa mga consumer.
Ginahinyu sigon nanda nga ibasura ro laye nga nagataeana it deregulation sa industriya it langis agud nga maibalik ro kontrol it gobyerno sa pagtaeana it presyo ag malikawan ro sobrang kita it mga kumpanya it langis.
Dugang pa kara nga ro andang tikang hay kaparte it mas maeapad nga kampanya kontra sa pagtaas it presyo it mga baeak-eon ag serbisyo.
Magasunod sa andang protesta ro Pamalakaya-Aklan, ro alyansa it mga fisherfolks, Panguma, kadamay ag pamatan-on nga estudyante.
