KALIBO, Aklan—Ginpatigayon it lokal nga gobyerno ro pagraffle sa kapin 150 nga housing units nga nahamtang sa Brgy. Nalook, Kalibo agud nga maidentify it benepisyaryo kon siin ro anda nga mga unit nga pwedeng maistaran sa oras nga pormal nga maiturn-over raya kanda.
Suno kay Carla Suñer, executive assistant to the office of the mayor it LGU Kalibo, ginpangunahan mismo ni mayor Juris Sucro ro ginpatigayon nga pagraffle it housing unit kon sa siin ro mga benepisyaryo hay ro mga eubusang apektado it bagyong Yolanda nga kapin sang dekada eon ro nakataliwan.
Ro mga nasambit nga housing units hay uwa pa it koneksyon it tubi ag kuryente kon sa siin ro mga naidentify nga tag-iya kara ro magaasikaso.
Madumduman nga ro nasambit nga pabahay hay mabuhay eon nga nakatindog ag uwa gihapon ginaokupahan it mga benepisyaryo nga dekada eon nga nagahueat agud nga mapasaalima nanda ro ginahandom nga pabahay halin sa gobyerno nga naging programa it National Housing Authority.
