Agud nga mapahagan-hagan ro epekto sa ekonomiya it padayun nga tensyon sa Middle East, paga-umpisahan it Department of Social Welfare and Development ukon DSWD Western Visayas ro pagpatuman it andang localized Cash Relief Assistance para sa mga kwalipikadong tricycle driver sa rehiyon umpisa hin-aga nga adlaw it Miyerkules, Abril 8.
Raya ro ginkumpirma ni DSWD-6 regional information officer Therese Fely Legaste.
Suno kana nga ro unang rollout hay magasentro sa mga miyembro it Tricycle Operators and Drivers Associations ukon TODA sa nagkaeain-eain nga siyudad ag banwa sa rehiyon.
Ro kada driver suno kana hay makabaton it tig-₱5,000.
Para sa pilot implementation, maga-umpisa ro DSWD-6 sa Iloilo City nga pagasundan it mga component city kapareho it Passi sa Iloilo ag Roxas sa Capiz, pati eon ro mga kaiping nga banwa.
Ginpaathag nana nga ro nasambit nga inisyatibo hay umpisa it lokalisasyon it distribusyon it subsidiya, nga nagatuyo nga direktang maihatud ro bulig it national government sa sektor it transportasyon sa grassroots level ag malikawan ro mga sabeag sa logistics.
Ginpahayag ni Legaste nga ro mga local government unit ukon LGUs ro nagtau it master list base sa mga prangkisang gintau sa TODA sa andang nasakupan.
Maid-id nga gin-usisa it ahensiya ro listahan agud nga masiguro nga owa it ginatawag nga “deduplication” ukon dobleng pangaean antes nga gin-proseso ro payroll.
Ginklaru man nana nga ro nasambit nga programa hay para eamang sa mga driver ag bukon it kaibahan ro mga operator.
Ginpadumdum kara ro mga TODA driver nga personal nga magtambong ag magdaea it andang driver’s license sa adlaw it payout.
Ro mga una sa validated ag deduplicated nga listahan it benepisyaryo ro mataw-an it ayuda.
Bantayan eamang sigon ro andang dugang nga anunsyo sa mga pay-out areas sa andang natungdan nga lugar.
Samtang, ginpasiguro man kara nga hugut nanda nga ginapatuman ro anti-epal policy sa distribusyon it mga ayuda.
Apang bilang partner hay naga-imporma sanda ag nakikipag-angot sa mga LGU officials antes ro pagpatigayon it pay-out.
