Nagsaka eon sa 15 nga katawo ro namatay sa pagbueungguan it tren maeapit sa Jakarta, Indonesia, nga haeos tanan hay puro kababayin-an suno sa mga awtoridad.
Natabu ro insidente ko Lunes sa Bekasi Timur Station kat bumunggo sigon ro sangka long-distance train sa nalikod nga parte it nakapundo nga commuter train.
Ro nasambit nga bagon hay nakataeana para sa mga babayeng pasahero nga nagatau it espasyo kontra harassment.
Naga-abot sa 88 nga iba pa ro naninahan nga insigidang gindaea sa nagkaeain-eain nga ospital, samtang ro mga namatay hay ginpaidaeum sa proseso it pagtumod sa andang pagkatawo.
Suno sa state-owned railway operator PT Kereta Api Indonesia, eowas man ro 240 nga pasahero it long-distance train nga eakot sa insidente.
Padayun pa ro imbestigasyon it mga awtoridad, kaibahan ro Indonesian police ag ro National Transportation Safety Committee, agud nga matumod ro ensaktong rason it aksidente.
Angot kara, ginkumpirma man it National Search and Rescue Agency (Indonesia) nga natapos eon ro rescue operation ag owa eon it nadugang pa nga biktima.
Aminado ro mga awtoridad nga pirme ro mga aksidente sa lumang railway system it Indonesia kun sa siin ko Enero 2024, sambilog pang train collision sa West Java ro natabu nga nagresulta sa pagkamatay it indi maganaba sa ap-at nga katawo.
