KALIBO, Aklan — Nagapadayun ro distribusyon it Department of Agriculture it bulig pinansiyal sa idaeum it Presidential Assistance for Farmers and Fisherfolk Program (PAFFP) para sa masobra sa 36,000 nga benepisyaryong mangunguma ag mangingisda sa probinsiya it Aklan.
Suno kay Engr. Alexys Apolonio, head it Office of the Provincial Agriculturists (OPA)-Aklan nga sa idaeum it nasambit nga programa, kada kwalipikadong benepisyaryo hay makabaton it P2,325 cash assistance agud nga makabulig sa nagataas nga gastos sa produksyon, partikular sa krudo, abono, irigasyon, makinarya, ag operasyon it pagpangisda.
Magapadayun suno kana ro distribusyon hasta nga maubos ro gintaeana nga pondo para sa probinsiya.
Kaibahan sa mga target nga benepisyaryo ro mga mangungumang nagatanum it paeay nga may daywang ektarya panaba, mga corn farmers, ag municipal fisherfolk nga rehistrado sa mga nagakaigo nga database it gobyerno.
Ginpahayag dugang nga maskin maisot eamang ro kantidad apang makabulig raya bilang insigidang ayuda sa sektor it agrikultura ag pangisdaan nga eubus nga naapektuhan sa pagtaas it presyo it petrolyo.
Tuyo it programa nga mapabilin ro produksyon it pagkaon sa nasyon ag masuportahan ro pangabuhian it mga mangunguma ag mangingisda sa tunga it hangkat sa ekonomiya.
Madumduman nga ro DA hay nagtaeana it ₱10 bilyon para sa Presidential Assistance for Farmers and Fisherfolk Program para sa kapin sa 4.17 milyong benepisyaryong mangunguma ag mangingisda sa nagkaeain-eain nga parte it nasyon.
