Sulit ro paghueat it sangka babaye agud nga mataw-an it katumanan ro anang ginahandum nga magka-unga.
Sa Ethiopia, nag-unga ro sangka babaye it bukon eamang it sambilog ukon kambal, kundi nga lima gid matapos ro haeos 12 anyos nga pag-hueat.
Suno sa 35 anyos nga si Bedriya Adem, may unga sa ibang babaye ro anang mister ag naga-istar man sa andang baeay. Ginhambaean sigon imaw it anang asawa nga batunon eon lang ro anang kabit ag andang unga bangud sa pagpati nga imaw hay baog ukon indi makasarang nga magnabdos.
Mag-eowas kara, masakit man sigon sa anang baeatyagon nga pirmeng gina-usisa sa andang bilog nga village kun ham-an nga owa imaw naga-nabdos.
Apang ko ulihi, grabe ro anang kasadya matapos nga masayuran nga imaw hay naga-nabdos ag ap-at nga babies ro sueod it anang tiyan.
Apang sa anang pag-unga hay quintuplets ro nagguwa ukon limang ka eapsag.
Ginpahayag it doctor nga natural nga nag-nabdos si Bedriya ag owa nagpaidaeum sa in vitro fertilisation (IVF).
Base sa data, sambilog eamang sa 55 million ro tsansa nga mag-nabdos it quintuplets sa natural nga pamaagi.
Sa makaron, nagalitik man ro ueo it nanay nga sangka mangunguma kun paalin nana nga mapabahoe ro anang mga unga apang nagapati imaw nga paga-giyahan imaw ni Allah.
Sanday Naif, Ammar, Munzir, Nazira, ag Ansar ro ginaeauman nga magbahoe nga healthy bangud nga owa man it problema sa andang ikamayad nga eawas.
