Opisyal eon nga nakilaea ro mga nabilin pang reyna it Miss Universe Philippines matapos ro Coronation Ball nga ginpatigayon sa Parañaque City gabi-i it Domingo, Mayo 10.
Sa nasambit nga pagtililipon, ginkoronahan ro mga kandidatang magarepresenta it Pilipinas sa nagkaeain-eain nga international pageants sa idaeum it “The Miss Philippines” brand.
Kaibahan sa mga ginkilaea hay si Allyson Hetland bilang Miss Supranational Philippines, samtang si Bella Ysmael man hay ginkoronahang Miss Cosmo Philippines.
Si Jenrose Javier ro magiging Miss Eco International Philippines, ag si Apriel Smith hay Miss Charm Philippines.
Kaibahan man sa mga bag-ong titulo si Nicole Borromeo bilang Miss Worldwide Philippines ag si Marianne Arellano bilang Miss Tourism Worldwide Philippines.
May mga special titles man nga gintau sa pilang semifinalists kapareho nanday Catherine Wardle bilang Miss Teen Universe Philippines ag Trexy Paris Roxas bilang Miss Eco Teen International.
Suno sa organisasyon, raya ro unang kahigayunan nga ginpatigayon ro sangka Coronation Ball agud nga opisyal nga ipasa ro mga korona, kabaylo it dating tradisyong madasigan nga awarding pagkatapos it main pageant night.
Madumduman nga ro korona it Miss Universe Philippines 2026 hay nauna eon nga gintau kay Bea Millan-Windorski sa sangka separadong coronation ko Mayo 2 sa Pasay City.
