Ginklaro ni Aklan 1st district Congressman Jesus “Jess” Marquez nga uwa nag-kriar it ‘confusion’ ro naging pahayag nanday Aklan 2nd district Congressman Florencio Miraflores ag Governor Jose Enrique Miraflores angot gina-alegar nga pag-atras sigon ni Ramon Ang, presidente ag CEO it San Miguel Holdings Corporation (SMC) sa paga-ubra it 2.54 kilometrong Boracay Bridge Project.
Suno kana, kun pamatian ro mismong statement hay uwa man sigon sanda nag-buhi it word nga ga back out si Ang, kundi indi anay sigon padayunon bangud sa pagpameabag it mga stakeholders ag mga lokal nga gobyerno sa probinsya.
Paathag nana, ro nag-tao malang sigon it kalituhan hay ro mali nga pag-intindi ag mga nagapakalhit it fake news.
Ginpamatud-an man nana ro pahayag it mga opisyal bangud nga kaibahan imaw sa mismong meeting nga ginhiwat sa San Miguel Corp. ku nagtaliwan nga Mayo 13.
Maayos man sigon ro naging pag-istorya ag ginhathat man ro mga isyu sa sektor kun sa siin ginbaton man nana ro mga sintimyento, posisyon ag stakeholders.
Sa kabilugan, ginklaro ni Marquez nga gin-paiway eamang ro nasambit nga proyekto bangud sa mabaskog nga oposisyon kara.
Ginpunto man nana nga indi maumpisahan ro nasmabit nga proyekto kun uwa it social acceptability, ag suporta halin sa mga stakeholders.
