Madali eon lang nga makabilog it kasugtanan ro Pilipinas ag Japan para sa posibleng pagsaylo it pilang military equipment, kaibahan ro mga destroyer ships ag sangka patrol/spy aircraft, bilang kaparte it pagpaeapad it depensa it nasyon.
Base sa report, nagkasugot ro Department of National Defense (DND) ag Japanese Defense Ministry nga padayunon ro diskusyon para sa transfer it mga Abukuma-class destroyer escorts ag TC-90 patrol aircraft sa Pilipinas.
Raya ro ginakabig nga sambilog sa pinakamabahoe nga tikang sa nagadaeum nga defense cooperation it daywang nasyon, eabi eon sa tunga it mas naga-init nga tensyon sa Indo-Pacific region.
Sakop man it kasugtanan ro mga detalye kapareho it pag-training it Philippine Navy personnel, maintenance, ag suporta sa paggamit it mga equipment sa oras nga mapadaea eon raya sa nasyon.
Suno sa mga opisyal, kaparte raya it mas maeapad nga plano it Pilipinas nga pabaskugon ro relasyon kara sa mga kaalyado ag paeaparon ro modernisasyon it Armed Forces of the Philippines.
Padayun pa ro negosasyon ag owa pa it final nga numero it mga destroyers ag aircraft nga planong igasaylo sa Pilipinas.
