Nakataeana nga pagadaehon sa Korte Suprema it kampo it mga Duterte nga Partido Demokratiko Pilipino (PDP), ro isyu it liderato sa Senado.
Raya hay kasunod sa pagpungko ni Senator Sherwin Gatchalian bilang Senate President Pro Tempore ag ro pagbag-o it liderato pinaagi sa 12 nga boto it mga senador.
Suno kay PDP Deputy Spokesperson Atty. Ferdinand Topacio, paga-kwestiyunon nanda sa Korte Suprema ro nasambit nga mga tikang it mga senador.
Para kay Topacio, kueang ro 12 nga boto para bayluhan ro liderato bangud 13 ro kinahangean para makabig nga mayorya sa Senado.
Nasayuran nga ginbuslan it bag-o nga mayoriya ro nagadumaea sa Senado matapos ro daywang adlaw nga pag-absent it majority bloc nga ginapangunahan it Senate President ko rato nga tiempo nga si Sen. Alan Peter Cayetano.
Si Cayetano ag kaabuan sa mga Senador nga anang kaibahan hay kaalyado it pamilya Duterte. Nauna eon nga gin-agaw nanda ro pwesto kay dating Senate President Tito Sotto III sa tunga it mga nagahana nga impeachment trial ag botohan kon baea i-convict si Vice President Sara Duterte.
