Ginpahayag ni Pope Leo XIV nga nagapabilin nga “open wound” ro sexual abuse sa sueod it Simbahang Katolika samtang gina-umpisahan nana ro anang state visit sa Spain, kun sa siin, nakipagpueong man imaw sa mga biktima.
Nag-abot ro 70-anyos nga Santo Papa sa Madrid ag gin-abi-abi nanday King Felipe VI, Queen Letizia, ag Prime Minister Pedro Sánchez.
Suno sa Vatican, nakipagkita imaw sa pilang biktima it pagpang-abuso it mga klero, samtang ginpahayag nana sa mga mamamahayag nga “still an open wound”.
Ginaboeobanta nga 200,000 menor de edad ro naka-eksperyensiya it abuso sa Spain umpisa ko 1940, base sa report ko 2023 it national ombudsman it nasyon. Nagkasugot eon man ro gobyerno ag Simbahang Katolika sa Spain ko Marso para sa kompensasyon it mga biktima.
Kadungan it anang pagbisita, may nakataeanang prayer vigil maeapit sa Santiago Bernabéu Stadium sa Madrid nga ginaeauman nga pagatambungan it masobra sa 400,000 nga pamatan-on.
Ginpahayag man it Santo Papa nga nalipay imaw sa nagabahoe nga interes it mga pamatan-on sa Simbahan, apang ginakilaea nana ro mga hangkat it modernong paniempo, kaibahan ro kompetisyon it pagtu-o ag kultura it pamatan-on kapareho it concerts.
Nagpahayag man imaw it pagkabaeaka sa padayun nga giyera sa Ukraine.
Sa anang biyahe, magahambae man imaw sa Spanish parliament ag magabisita sa Canary Islands agud nga makipagkita sa mga migrante ag sa mga nagabulig kanda kaibahan si PM Sánchez, bilang pagdumdum sa mga namatay sa peligroso nga pagbiyahe paagto sa Europe.
Ginaboeobanta nga masobra sa 1,000 nga migrante ro namatay ukon naduea kada dag-on sa ruta paagto sa Spain halin sa Africa, suno sa International Organization for Migration.
Sa tunga it pagbisita, naka-deploy ro libu-libong pulis para sa seguridad, samtang ginaeauman man ro pag-atubang it Santo Papa sa sangka “polarized country” kun sa siin may tensyon sa isyu it immigration ag politika.
