Hugut nga ginpamalibaran ni Department of the Interior and Local Government (DILG) Secretary Jonvic Remulla ro mga report angot sa gina-alegar nga nakabaton it espesyal nga pagtrato ro contractor nga si Curlee Discaya matapos raya nga arestuhon angot sa mga kasong may kaangtanan sa maanomalyang flood control projects.
Ginpahayag ni Remulla nga owa it kamatuoran ro mga alegasyong ginaprotektahan si Discaya bangud sa gina-alegar nga koneksyon kara sa mga gamhanan nga personalidad sa politika.
Sa pihak kara, ginklaru it sekretaryo nga kapareho it ibang detainees, igabutang si Discaya sa regular nga detention facility.
Ginpaathag man ni Remulla nga ro korte ro may gahum nga magdesisyon kon siin igabutang ro sangka akusado samtang ginapamatian ro anang kaso.
Samtang, ginpahayag man it DILG chief nga nagapadayun ro imbestigasyon sa gina-alegar nga flood control scam ag ginaeauman pa ro pagka-aresto it iba pang eakot sa operasyon.
Sa separado nga pahayag, ginpaabot it sekretaryo nga siyam eon sa 11 nga indibidwal nga nagapangatubang sa kaso ro sa kustodiya eon it mga awtoridad.
Madumduman nga nauna eon nga naaresto ro asawa ni Curlee nga si Sarah Discaya, nga presenteng nakakulong sa Lapu-Lapu City Jail sa Cebu.
Si Curlee Discaya hay siyam nga buean eon nga sa kustodiya it Senado matapos ipa-contempt ko Setyembre 2025 sa pagpamati it Senate Blue Ribbon Committee bago imaw uman nga arestuhon angot sa mga kasong ginpasaka kontra kana.
