Nagnaba ro satisfaction ratings it Senado, House of Representatives, ag Supreme Court sa unang quarter it 2026, base sa pinaka-ulihing survey it Social Weather Stations nga ginpaguwa adlaw it Huwebes.
Ginpatigayon ro nationwide survey umpisa Marso 24 hasta 31 pinaagi sa face-to-face interviews sa 1,500 Filipino adults. Ginhimo ro survey bago ro mga naging kinagamo sa Senado, kaibahan ro shooting incident, lockdown, ag mga pagbag-o sa liderato.
Naglista ro Senado it +11 net satisfaction rating, mas manaba sa +14 ko Nobyembre 2025. Sa survey, 42 percent it respondents ro naghambae nga satisfied sanda sa performance it Senado, samtang 31 percent ro dissatisfied.
Naangkon man it House of Representatives ro +13 net satisfaction rating, sangkiri nga mas manaba sa dating +14, matapos makalista it 42 percent satisfaction ag 29 percent dissatisfaction.
Nagnaba man sa +11 ro rating it Supreme Court halin sa +17 ko Nobyembre 2025, kun sa siin 42 percent ro satisfied ag 30 percent ro dissatisfied.
Sa pihak it pagnaba, ginpahayag it SWS nga nagapabilin sa “moderate” category ro ratings it tatlong institusyon.
Pinakamataas ro satisfaction scores it tatlong institusyon sa Mindanao. Naglista ro Senado it +26 sa Mindanao, +14 sa Visayas, +9 sa Balance Luzon, ag -13 sa Metro Manila.
Nabo-oe man it House ro pinakamataas kara nga rating sa Mindanao nga +26, kasunod ro Visayas nga +18, Balance Luzon nga +9, ag Metro Manila nga -5.
Pinakamataas man ro rating it Supreme Court sa Mindanao nga +26, kasunod ro Visayas nga +14, Balance Luzon nga +9, ag Metro Manila nga -13.
Suno sa SWS, nagnaba ro ratings it Senado ag Supreme Court sa kaabuan it mga lugar mag-eowas sa Mindanao, samtang ro pagtaas it rating it House sa Mindanao hay nabawi it pagnaba sa Balance Luzon ag Metro Manila.
