Nagresulta sa kinagamo ag engkwentro sa tunga it mga raliyista ag kapulisan ro maeapnagon nga anti-G7 protest sa Geneva, Switzerland ko Hunyo 14, bisperas it opisyal nga pag-umpisa it G7 Summit.
Naga-abot sa ginaboeobanta nga 20,000 nga katawo ro nagpasakop sa martsa nga gin-organisa it koalisyong “No-G7”. Kapin sa 600 nga miyembro it radical “Black Bloc” ro naghalo sa malinong nga rally ag nag-umpisa it kinagamo.
Nag-eontad ro hubeag-protesta sa sangka parke sa kilid it Lake Geneva bago nag-grabe ro sitwasyon sa sentro it siyudad.
Nagtuga it kahalitan ro bayolenteng protesta kun sa siin sangka maeahaeon nga saeakyan nga Tesla ro ginsug-an ag eubusan nga nasunog sa atubang it central bus stop.
Ginbasag man it mga raliyista ro mga bintana it opisina it United Nations (UN), partikular eon ro International Telecommunication Union (ITU).
Gin-atake ag ginpangbasag man ro mga saeaming it mga pribadong bangko ag ro opisina it kumpanyang Price water house Coopers (PwC).
Naghaboy man it mga bato ro mga naka-mask nga mga pamatan-on, kaibahan ro mga bote, semento, ag paeupok sa mga otoridad.
Ginsabat man raya it Swiss riot police ag gumamit eon it tear gas ag water cannons agud nga tabugon ag tapnaon ro bayolenteng grupo.
Nagpatuman it maabung pag-aresto ro kapulisan ag nakarekober it mga peligrosong armas kapareho it kutsilyo, wasay, ag pangbunae.
Nagpakalhit man it 4,000 military personnel ro Switzerland ag ginsarado ro haeos tanan nga border crossings paagto sa France bilang pag-dahan.
Base sa report, nag-ugat ro kaakig it mga aktibista sa andang pagkontra sa konsentrasyon it manggad sa mga manggaranon nga mga nasyon ag korporasyon samtang naaywan ro mga pigado. Ginbatikos man nanda ro mga polisiya ni US President Donald Trump angot sa ekonomiya, pagpapanaog it mga taripa ag climate issues kamana man nga nagprotesta sanda sa mga nagakatabu nga giyera ag pagtau it suporta para sa kinamatarung it mga Palestinian.
