Sangka eapsag ag daywang 11-anyos nga unga ro kaibahan sa mga madinaeag-on nga naeowas it mga international rescue team sa nahugos nga building sa Venezuela pilang adlaw matapos tumama ro daywang mabaskog nga linog.
Sa videong ginpakigbahin it US State Department, makita ro pag-eowas sa sangka eapsag nga himalamang buhi nga nabo-oe halin sa idaeum it nahugos nga edipisyo.
Samtang, sangka 11-anyos nga ungang eaeaki man ro naeowas it rescue team halin sa Colombia matapos imaw nga makit-an nga naka-eubong it haeos tatlong metro sa idaeum it mga nahugos nga debris.
Nag-angkon imaw it bali sa anang butkon ag insigidang gindaea sa ospital. Owa man naeowas ro anang ina ag igmanghud sa kalamidad.
Sambilog pang 11-anyos nga unga ro naeowas it rescue team halin sa Mexico sa banwa it Caraballeda.
Suno kay Interim President Delcy Rodriguez, kapin sa 1,430 eon ro kumpirmadong namatay kun sa siin 3,000 nga katawo ro naninahan samtang haeos kaparehong numero man ro temporaryong nagapabilin sa mga evacuation centers.
Gin-report man nana nga pagapapunduhon eon it mga rescue team ro search operations sa pilang lugar matapos nanda nga matumod nga owa it senyales it mga kabuhi nga nakaeowas sa nahugos nga mga debris.
Nagtaeana man ro European Union it kapin sa €5 million bilang emergency aid, samtang ginaeauman man nga maga-anunsyo ro Estados Unidos it dugang nga pondong igabulig sa mga apektadong komunidad.
Samtang, nagpaabot it pakikisimpatiya ag pangamuyo si Pope Leo XIV para sa mga biktima it linog ag nagpasaeamat sa mga rescuer nga nagabulig sa operasyon.
