Mabahoe ro gin-naba it numero it mga barkong naga-agi sa Strait of Hormuz kasunod it naga-grabeng tensyon sa tunga it Estados Unidos ag Iran, suno sa International Organization for Independent Tanker Owners.
Halin sa masobra sa 130 nga barkong naga-agi kada adlaw antes ro tensyon, sangka digit eon lang sigon ro nagagamit it importanteng rutang pandagat matapos ro panibag-ong baeayluhan it airstrike it daywang nasyon ko Miyerkules ag Huwebes.
Suno sa militar it Estados Unidos, tinamaan it andang operasyon ro masobra sa 90 target it militar it Iran, kaibahan ro pilang pasilidad nga maeapit sa Strait of Hormuz. Tuyo sigon kara nga pahinaon ro ikasarang it Iran nga magpatigayon it pag-atake kontra sa mga komersyal nga barko ag sibilyang naga-agi sa lugar.
Ginkumpirma man it Iran nga indi maganaba sa 14 nga katawo ro namatay sa mga pag-atake it Amerika. Ginreport man it state media it Iran nga may mga lugar nga maeapit sa Bushehr nuclear power plant ro tinamaan, maskin nga owa pa it pahayag ro Estados Unidos angot kara.
Bilang baeos, ginpahayag it Islamic Revolutionary Guard Corps (IRGC) nga nagpatigayon sanda it mga pag-atake sa mga base militar it Amerika sa Kuwait ag Bahrain. Nagpaandam man ro grupo nga posible pang magpatigayon it panibag-ong missile attacks sa Kuwait, Jordan, ag Iraq, kun sa siin may mga base militar man ro Estados Unidos.
Suno sa Iranian Ministry of Health, naga-abot eon sa 78 ro naninahan sa mga pagpamomba it Amerika ko Hulyo 8 ag 9, samtang 47 kanda ro nagapabilin nga naka-confine sa ospital.
Samtang, ginpahayag ni U.S. President Donald Trump nga gusto sigon it Iran nga uman nga makipagkasugot sa Estados Unidos, apang nagpahayag imaw it pagduda kara. Ginpamalibaran man raya ni Iranian Foreign Minister Abbas Araghchi ag ginpamilit nga magasabat ro Iran sa mga tikang it Amerika pinaagi sa mas grabeng aksyon.
