Magadaea it magaeumon nga kaeangitan, pag-uean, ag mabaskog nga hangin ro Typhoon Inday ag habagat sa mabahoe nga parte it nasyon makaron nga adlaw it Sabado, suno sa Philippine Atmospheric, Geophysical and Astronomical Services Administration (PAGASA).
Base sa weather bulletin it PAGASA, ulihing naispatan ro sentro it Bagyong Inday sa kaeayuon nga 490 kilometro naaminhan-nasidlangan it Itbayat, Batanes.
Daea it bagyo ro kabaskog it hanging naga-abot sa 140 kilometro kada oras maeapit sa sentro ag pagbugsong hasta sa 170 kilometro kada oras. Nagahueag raya sa direksyong pa-naaminah-nakatundan sa kadasigon nga 20 kilometro kada oras.
Bangud kara nagapabilin nga sa idaeum it Tropical Cyclone Wind Signal Number. 2 ro Batanes samtang signal number 1 man sa Cagayan, kaibahan ro Babuyan Islands; Apayao; naaminhan-nasidlangang parte it Isabela; ag naaminhan ag sentro nga parte it Ilocos Norte.
Nagpaandam ro state weather bureau sa posibilidad it pagbaha ag paghugos it eugta tuga it katamtaman hasta mabaskog nga pag-uean, kamana man ro paeag it mabaskog nga hangin nga pwedeng magtuga it hasta sa katamtamang kahalitan sa kabuhi ag propiyedad.
Samtang, maka-eksperyensiya it kon amat nga pag-uean ro Metro Manila, MIMAROPA, Western Visayas, Negros Island Region, La Union, Pangasinan, Benguet, Zambales, Bataan, Cavite ag Batangas bangud sa ginpabaskog nga Habagat.
Sa nabilin nga parte it Mindanao, ginaeauman ro medyu magaeumon hasta magaeumon nga kaeangitan nga may mga kalhit-kalhit ukon thunderstorms.
Ginaeauman nga magaguwa it Philippine Area of Responsibilities (PAR) ro bagyo, agahon it Sabado.
