Umani it atensyon sa social media ro kakaibang trend sa Russia kun sa siin ginahungod nga basagon ag gasgasan it pilang kaeaeakin-an ro andang maeahaeon nga iPhone agud nga mag-itsura sigon raya nga mas “manly” ukon pang-eaeaki.
Nagkalhit ko nagtaliwan nga mga inadlaw sa TikTok ro mga video it mga eaeaking gina-eampos, ginakaskas, ginabuhuan ag ginasamad ro likod it andang mga cell phone. Tuyo nanda nga mag-itsurang luma ag bugbog ro andang mga gadget maskin nga maayos ag bago pa ro mga raya.
Suno sa Russian news outlet nga Mash, nag-umpisa sigon ro trend matapos mag-share ro pilang kababayin-an it mga litrato ag video it lumang iPhone 11 nga maabung basag. Ginbutang sa andang mga caption nga mas bagay sa sangka “matuod nga eaeaki” ro sangka bugbog nga lumang cell phone kaysa sa makinis ag bag-ong iPhone 17 Pro.
Bangud kara, gintuead it pilang kaeaeakin-an ro itsura ag ginhungod nga samaron ro andang kaugalingon nga mga iPhone para mag-itsura sanda nga ‘astig’ ag ‘macho’. Sa pihak kara, may pilang cell phone sigon ro eubusan nga nasamad ukon owa eon nag-gana matapos nga i-eampos ag buhuan.
Nagpaandam man ro mga eksperto nga bukon eamang it magastos kundi peligroso man ro nasambit nga trend. Kon mabasag ro likod it iPhone, posibleng maduea ro proteksiyon kara kontra sa tubi ag alikabok.
Posible man nga aksidenteng magabot ro lithium-ion battery sa sueod it cell phone. Pwede raya nga magtuga it sobrang pag-init, pagkaeayo, ukon pagsabog it device.
Sa pihak it mga peligro, padayun sa gihapon nga nagakalhit ro mga video samtang ginatestingan it pilang netizen nga obrahon nga simbolo it pagkaeaeaki ro sangka samad nga smartphone.
