Ginmanduan ni Pangueong Ferdinand R. Marcos Jr., ro Department of Energy (DOE) nga insigidang solusyunan ro problema sa suplay it kuryente sa Visayas kasunod it sunod-sunod nga Yellow ag Red Alert sa rehiyon.
Ginpahayag ni Energy Secretary Sharon Garin, nga direktang ginmandu it pangueo nga ayuson ro sitwasyon rason nga nagapahaum eon ro DOE it sangka pangmabuhayan nga plano para sa Visayas, kamana man sa Mindoro ag Palawan.
Suno kana nga kaibahan ro tatlong lugar sa mga nagapangunang lugar nga may problema sa suplay it kuryente ag kinahangean nga mataw-an it pangmabuhayan nga solusyon.
Sa oras nga mapatuman ro nasambit nga mga tikang, ginaeauman nga indi eon kinahangean nga saepon it Luzon ag Mindanao ro kakueangan sa suplay it kuryente sa Visayas.
Makaron nga adlaw it Biyernes, uman nga nagdeklara ro National Grid Corporation of the Philippines (NGCP) it Yellow Alert sa Visayas Grid umpisa alas-6 it gabi-i hasta alas-7 it gabi-i bangud sa manipis nga reserba it kuryente ag pilang power plant nga owa naga-operate it normal.
