Nabuoe it Filipina Muay Thai fighter nga si Islay Erika Bomogao ro puwesto sa ONE Championship main roster matapos patumbahon sa knockout ro Thai nga si Klinphaka Por Thaisong sa andang atomweight Muay Thai bout sa ONE Friday Fights 164 sa Lumpinee Boxing Stadium sa Bangkok, Thailand.
Gintapos ni Bomogao ro hampang sa paagi it mabaskog nga right punch sa panga it anang kontra, rason para indi eon raya magpadayon.
Ginpundo it referee ro hampang 13 segundo pa eamang sa pangatlong round.
Sa pihak nga nakaeksperyensya it grabe nga hangkat sa unang round ag kun amat nga napabagsak it kontra, nabawi ni Bomogao ro kontrol sa pangaywang round sa paagi it sunod-sunod nga elbow strikes antes daeayon nga mapada-og ro hampang sa pangatlong round.
Sa kadaeag-an, nagapabilin nga uwa it perdi si Bomogao sa 5-0 record ag nalista ro anang pangatlong sunod nga daog sa paagi it stoppage.
