KALIBO, Aklan — Patay ro sangka rider ag angkas kara matapos nga bumunggo sa poste it solar light ro andang ginasakyan nga motorsiklo pasado alas-8:00 it gabi-i it Martes, Agosto 4 sa Diversion Road sa banwa it Tangalan.
Base sa imbestigasyon, ginpahayag ni P/Major Jayson Mausig, hepe it Tangalan Municipal Police Station, halin sa sangka birthday celebration ro 41-anyos nga driver nga residente it Brgy. Mabilo, Kalibo kaibahan ro 31-anyos nga backrider nga taga-Camanci Sur, Numancia.
Samtang nagapa-agto sa direksyon it Makato, gina-alegar nga naduea-an it kontrol sa manibela ro driver rason nga bumunggo ro motorsiklo sa poste.
Bangud sa impact, inapok ro driver sa karsada samtang naaywan ro backrider sa kilid it daean.
Insigida sanda nga gindaea it mga rumespondeng tawuhan it MDRRMO Tangalan sa Dr. Rafael Tumbokon Memorial Hospital apang parehong gindeklara nga dead on arrival bangud sa mga naangkon nga grabeng lastro sa ueo ag eawas.
Narekober man sa lugar ro sangka helmet nga ginapatihan nga suksok it driver, samtang sa kustodiya eon it Tangalan MPS ro eakot nga motorsiklo nga Yamaha Mio para sa nagakaigo nga disposisyon.
