Masubo nga ginpahayag ni Arnel Rico ro detalye it pagkamatay it ana nga paryente nga si alyas “Isko,” matapos mga madisgrasya sa motorsiklo sa Brgy. Tagas, Tangalan, Aklan.
Suno kay Arnel, alas-4:30 it hapon pa kunta ro out it biktima sa trabaho bilang construction worker, apang pag-abot it alas-6:00 it gabi-i, uwa gihapon imaw nakauli.
Bangud nagadueom eon ag uwa gihapon ro biktima, naghuna-huna si Arnel nga posible nga ginpa-overtime raya.
Apang alas-11:30 it gabi-i, ginpukaw sigon imaw it anang mga unga matapos makabaton it tawag nga patay eon kuno si Isko.
Dayon nga nag-adto ro anang mga unga sa Aklan Provincial Hospital agud usisa-on kon si Isko gid man ro biktima.
Bangud sa indi eon makilaean-an ro biktima tuga it grabe nga kahalitan sa anang itsura, nagbase eon lang sanda sa palatandaan nga sangka tattoo sa anang dughan ag nakumpirma nga raya hay andang paryente.
Base sa impormasyong nabaton it pamilya, nanunggab sa poste ro motorsiklo bangud sa madasig nga pagpadaeagan it nagamaneho.
Uwa man sigon raya it suksok nga helmet sa oras it aksidente bangud sa ginsampit man lang imaw sa nasambit nga lugar.
Padayon ro imbestigasyon it kapulisan agud matumod ro bilog nga sirkumstansya it natabong disgrasya.
