Naga-abot eon sa masobra 95 porsiyento it mga residente sa Western Visayas ro naeakip sa Philippine Health Insurance Program it gobyerno.
Suno kay PhilHealth 6 Regional Vice President Marjorie Cabrieto, una eon sa masobra 7.7 milyon ro rehistrado nga mga miyembro ag dependents sa Aklan, Antique, Capiz, Guimaras ag Iloilo, kaibahan ro Negros Occidental.
Suno pa kana, mas mataas ro registration rate it Western Visayas kon igakumpara sa iba nga regional offices it PhilHealth.
Apang naga-abot pa sa kapin sa 5 porsiyento it populasyon ro owa nakaibahan sa programa. Eakip kara sa mga owa naka-rehistro hay ro mga residente nga naga-istar sa Geographically Isolated and Disadvantaged Areas o GIDA, nga kaparte man sa mga ginatutukan it regional office.
May mga residente man nga posible owa eon naka-agto sa mga opisina it PhilHealth para magparehistro bangud sa distansya ag iba pa nga kabangdanan.
Nagpasaeamat man si Cabrieto sa Philippine Statistics Authority nga nagabulig sa PhilHealth bilang partner sa paglibot ag pagdaea it registration services sa nagkaeain-eain nga lugar sa rehiyon.
Sa kabilugan, may una nga masobra 8.1 milyon ro projected population it Western Visayas.
