Nagpaandam ro mga opisyal it Chinese embassy nga pagapresuhon ro mga Pinoy nga nagatrabaho sa China kon indi pagpahilwayon ro mga Chinese nationals nga gin-aresto sa gin-raid nga steel manufacturing facility sa Misamis Oriental.
Sa hearing it Senado, ginpahayag ni Presidential Anti-Organized Crime Commission (PAOCC) Director Benjamin Acorda Jr., nga ginhambaean sanda it mga taga-Chinese embassy kat magbisita sa anang opisina nga pagadakpon man ro mga Pilipino sa China kon indi pagpahilwayon ro mga Chinese workers.
Naga-abot sa 69 nga mga Chinese nationals ro gin-aresto it PAOCC sa pabrika it Philippine Sanja – Steel Corporation sa banwa it Tagoloan nga gin-raid bangud sa gina-alegar nga pag-eabag sa mga immigration, labor ag enviromental laws.
Mabahoe man ro pagkadismaya ni Senator Risa Hontiveros ag nagpanindugan nga dapat iprotesta it gobyerno ro nasambit nga pagpamaeag it Chinese embassy.
Punto it senadora, bukon it raya ro unang kahigayunan nga ginpa-agyan it Chinese embassy ro nasyon it bukon it manami nga pagbinatasan.
Sa pihak kara, owa it ideya si Acorda kat ginpangutana ni Hontiveros kon ham-an nga maabu ro Chinese nationals sa kompanya.
Nagakangawa pa si Acorda bangud pilang adlaw eamang matapos ro andang operasyon, may ginpakita eagi ro Chinese embassy nga kopya it valid working permits ag iba pa nga dokumento it mga gin-aresto.
