BATAN, Aklan–Hugut nga ginpamalibaran ni Punong Barangay Ethelda Iman it Barangay Cabugao, Batan ro mga alegasyong ginahaboy kontra kana nga suno kana hay may eamod pumulitika.
Kaibahan sa mga reklamo hay ro gina alegar nga pagpamuyayaw nana sa mga barangay health workers ukon BHW sa ginpatigayon nga weekly kalinisan meeting.
Suno kay Iman, daywang BHW eamang sigon halin sa 20 ro regular nga nagatambong sa andang domingguhan nga pueong, sa pihak it andang ginkasugtan.
Ginklaru it punong barangay nga owa imaw nagbuhi it mga maeain nga tinaga ag nagtaas eamang ro anang boses samtang ginapadumdum sa mga BHW ro andang obligasyon.
Kadungan kara, gin engganyo nana ro mga BHW nga unahon ro andang trabaho ag indi anay pag-isipon ro pulitika bangud nga temprano pa kara kara.
Sa pihak nga parte, ginklaru it opisyal nga owa nana ginsue-suean ro pamilya Alfaro nga magpasaka it reklamo angot sa pagpa-bulldose sa portion it andang eugta sa Sitio Caeog-a, Cabugao nga kaparte it ginahimo nga farm-to-market road.
Aminado ro kapitan nga owa it nagakaigo nga konsultasyon sa konseho ro proyekto ag bukon raya it kaibahan sa andang mga proyekto makaron sa barangay.
Nauna eon nga naistoryahan ro proyekto sa idaeum it administrasyon it dating punong barangay, apang owa pa it deed of donation bangud nga gina istoryahan pa it magmaeanghud nga tag-ana it eugta ro posibleng pag donar it portionit andang eugta.
Ro reklamo hay naaksyunan ag naresolba eon sigon it barangay council.
Samtang, ginklaru man ni Kapitan Iman nga owa it abiso sa barangay ro angot sa ginapatindog nga restaurant maeapit sa national highway sa andang lugar.
