Igapresenta it House prosecution team ro mga opisyal it Philippine Statistics Authority (PSA) sa impeachment trial kontra kay Vice President Sara Duterte suno kay House Prosecutor Terry Ridon.
Raya hay agud pamatud-an ro mga alegasyon nga “fictitious” ukon himo-himo eamang ro mga indibidwal nga gintaw-an it confidential funds it Office of the Vice President (OVP).
Suno sa mamalidha, kaibahan ro mga opisyal it PSA bilang mga testigo sa alegasyon it misused of confidential funds bangud nga sanda ro nagpatigayon it pagtuon ag ginbulgar raya sa ginapatigayon nga House inquiry.
Nagguwa sigon sa pagtuon nga ro mga pangaean sa acknowledgement receipts kaparehas it Mary Grace Piattos, Milky Secuya, ag iba pa hay uwa gin-onga, uwa ginkasae ag uwa namatay sa Pilipinas bangud nga uwa sanda sa mga rekord it PSA.
Rason nga maipakita sigon nanda nga peke ag himo-himo nga indibidwal eamang ro mga raya nga nagakahueogan nga may kababalaghan ag saea nga paggamit sa pondo it banwa.
Nauna eon nga ginpahayag it kampo it bise presidente ko Pebrero nga nakahaom sanda nga ipaathag ro paggamit it mga “alias” para sa confidential funds kaparehas it ginakwestyong recipient nga “Mary Grace Piattos,” nga kaparehas sa sikat nga brand it chichiria ag restaurant.
