Ginkumpirma ni OVP Assistant Chief of Staff Lemuel Ortonio nga imaw ro nagapanguna sa pagpaguwa, paggamit ag liquidation it pondo it Office of the Vice President ukon OVP ni Vice President Sara Duterte.
a ika-18 nga adlaw it impeachment trial ni Duterte, ginpahayag ni Ortonio nga uwa it confidential fund ro OVP kat imaw hay nag-umpisa sa pwesto ku Hulyo 2022.
Uwa man sanda, suno kana, it makaron nga pondo ku panahon ni dating Vice President Leni Robredo.
Bangud kara, nagpangabay ro OVP it confidential funds sa Department of Budget and Management ukon DBM paagi sa sueat nga may petsang Agosto 22, 2022.
Suno kay Ortonio, si Duterte ro nagtakda it kantidad nga ginpangabay.
Ginpakita it prosekusyon nga uwa it kaeakip nga computation ukon attachments ro sueat sa DBM.
Ginpakita man ro Physical and Financial Plan ukon PFP nga may petsang Setyembre 16, 2022, nga haeos isaeang ka buean matapos ro request sa DBM.
Ginkumpirma ni Ortonio nga uwa nag-agi sa anang opisina ro nasambit nga PFP.
uno pa kay Ortonio, ginpangabay ro confidential funds para sa mas sigurado nga pagpatuman it mga aktibidad it Good Governance Program ag mga opisyal nga engagement sa sueod ag guwa it pungsod.
Samtang, gin-deklarar ni Presiding Officer ag Senate President Francis “Chiz” Escudero si Ortonio bilang “hostile witness” matapos kuwestiyunon it prosekusyon ro pila ka bahin it anang mga pahayag.
Ginbansagan man it defense panel nga “theories” ag “sound bites” eang ro mga ginpresentar it prosekusyon may kaangtanan sa confidential funds it OVP.
Suno kay Atty. Kristine Ferrer, ro 11 ka punto nga ginpresentar it prosekusyon hay mga konklusyon ag haka-haka nga uwa pa napamatud-an sa impeachment court.
Apang, ginpahayag ni Ferrer nga magapadayon gihapon ro cross-examination kay Ortonio agud mapamatud-an ro mga alegasyon it prosekusyon.
