Ginmitlang ni Senator-judge Robinhood Padilla ro paggamit kato ni dating senador Benigno “Ninoy” Aquino Jr. it alyas agud nga ipaathag ro pagkinahangean sigon it paggamit it mga alias sa pagbuyot it sensitibong impormasyon.
Sa impeachment trial ni Vice President Sara Duterte, ginpangutana ni Padilla ro prosecution counsel kun pamilyar imaw sa alyas nga “Marcial Bonifacio,” nga gingamit sigon ni Ninoy Aquino.
Insigida man nga ginkumpirma ni Senator-judge Bam Aquino, gumankon ni Ninoy, nga gingamit it dating senador ro pangaeang Marcial Bonifacio sa anang pagbalik sa Pilipinas halin sa Boston ko 1983.
Sa pihak kara, ginklaru ni Bam nga indi maikumpara ro kaso ni Ninoy sa mga pangaean sa acknowledgment receipts (ARs) it confidential funds nga ginakuwestiyon sa impeachment trial.
“Wala naman ho siyang confidential funds,” pahayag ni Bam, ag gindugang nga owa man ro pangaean ni Ninoy sa mga AR it confidential funds.
Gingamit ni Ninoy ro passport nga may pangaeang Marcial Bonifacio sa anang pagbiyahe pabalik sa Manila ko Agosto 21, 1983. Sa nasambit man nga adlaw, imaw hay ginbaril pag-abot nana sa Manila International Airport.
Ro isyu sa paggamit it mga alyas hay uman nga nagguwa sa pagbista bangud sa mga makadueudang pangaean sa ARs it confidential funds it Office of the Vice President ag Department of Education, kaibahan sanday “Mary Grace Piattos,” “Kokoy Villamin,” “Magellan,” “Fiona,” ag iba pa.
